Day 12 / 02. January 2016

Hallo zäme, ihr fliessige Blogg-Verfolger

hüt isch es definitiv Zit gsi für ne schueu- und flugfreie Tag. S Program vo hüt isch aber trotzdäm sehr lehrrich gsi. Mer hei üs ufe Wäg gmacht nach Norde.

 

 Im Norde vo Saraota si mer über die grossi Brügg gfahre, wo mir über d Bucht nach St. Petersburg cho si. Uf dr Strecki hets ä Zahustation, wo jede wo über d Brügg wot fahre 1.25$ muess zahle.

 

 

Nach knapp einehaub Stung fahrt si mer a üsem Ziel acho...

 

 

 Einigi hei viellicht dr Film gseh, und erinnere sich a gwüssi Sache...

 

 

Spötestens jetz, gäu Tina, wesch wo mer häre si... 

D Gebäude und dr Igang vom Aquarium, gseh au in ächt so us wie mes vom Film könnt. Wär meh vo dere wohre Gschicht möchte wüsse, cha sich uf  www.seewinter.com ilogge.

Das isch dr Operationsaal vom Tierspital, wo näbscht Delfine, Wasserschildchröt, Robbe und angeri Meerestier operiert, pflegt und wieder id Freiheit entloh wärde.
 

Do chame gseh, wie Haie gfüetteret wärde, vo dene Hai, söus do in Florida vieli gä, aber si sige nid gfährlich.

Au Wasserschildchrött si do iheimisch.

Jetz si mer a dr eigentliche Attraktion acho. Im Daheim vo Winter und Hope.

Hope am spiele...

Winter isch aus ca 3 Monet aute Delphin, am Strand i dr nöchi vom Cap Canaveral gfunge worde. Schwär verletzt het si um s Überläbe kämpft, bis d Retter vom Clearwater Aquarium si cho. Verletz isch si worde vom ne im Meer triebende Fischeseili und em ne Metauchorb dran, Abfall wo öpr ohni z überlege het ir Natur lo liege. Das Seili het sich um ihri Schwanzflosse gwicklet und ihre ds Bluet abgstöut, so, dass de Retter nume d Amputaion vor Schwanzflosse isch übrig bliebe...   

Das si die künschtliche Schwanzflosse wo Winter ghöre.  Bereits 20 verschiedeni Exemlar si äxtra für sie agfertit worde. Sie treit se aber nume wenn sie Physiotherapie het, denn sie isch mit ihrere nöie Schwümmbewegig schnöuer aus mit dr schwäre Schwanzflosse.

 

 

Roche hei mer brüehrt...

Mer hei d Usstellig bsuecht wo me het chönne luege wie d Föume si drähit worde.

 

Chli erschlage vo dr länge Fahrt und de viele Idrück,  hets de Deheim no es "amerikanischs Riz Casimir " gäh.

No es paar Gedanke, wo mir sie bliebe hange vom hütige Tag. Die Delphine wo i däm doch sehr chline Wasserbecki läbe tüe mer mega leid und ig froge me öb me überhaupt sött ga luege....

Ja!!! Denn nume dur die usdurendi Höuf vo dene Mönsche het Winter und Hope überhaupt überläbt. Steuverträtend für aui die Tier, wo i üsne Meer läbe und Tag täglich zkämpfe hei mit dere schreckliche Veschmutzig vo üsne Ozeane, läbe die zwöi Tier im Aquarium.

Geschter het dr Tim ä längi Fischerschnuer vom Strand mit gno und se i Ghüder do...Jetz weiss är wieso, dass är geschter het öpis guets gmacht...

Dr hütig Blogg isch läng worde... ja, ig weiss es, aber jede wo weiss, dass dr Delphin mis Lieblingstier isch, verstoht, wurum s mir es Aliege isch gsi chli meh drüber z schriebe...und Tschüsss.